ಶುಭರಾತ್ರಿ ಗೆಳತಿ

ಶುಭರಾತ್ರಿ ಗೆಳತಿ

ಸಂಜೆಯಾಗಸದ ಮೋಡದಂಚಿನಲಿ
ದೂರದಿಗಂತದಿ ಗೋಚರಿಸುವ ನಕ್ಷತ್ರ
ಸಮೂಹದಲಿ ನಿಂತು ಹೇಳುವೆ ನಿನಗೆ
ಶುಭರಾತ್ರಿ - ಗೆಳತಿ

ಹುಣ್ಣಿಮಯ ದಿನದಂದು ತಿಂಗಳ ಬೆಳಕಿನಲಿ
ಭ್ರಮರವಾಗಿ ಝೇಂಕರಿಸುತ್ತಾ ಬಂದು
ನಿನ್ನ ಮುಂಗುರುಳತಾಗಿ ಗುಟ್ಟಾಗಿ ಹೇಳುವೆ
ಶುಭರಾತ್ರಿ - ಗೆಳತಿ

ಬೀಸು ತಂಗಾಳಿಯಜೊತೆ ಮಲ್ಲಿಗೆ
ಹೂವಿನ ಕಂಪಾಗಿ ತೇಲಿಬಂದು ನಿನ್ನ
ಸುವಾಸನೆಯಲಿ ಮೈಮರೆಸಿ ಹೇಳುವೆ ನಿನಗೆ
ಶುಭರಾತ್ರಿ - ಗೆಳತಿ

ಕಡಲತಡಿಯಲಿ ಬಡಿವ ಅಲೆಗಳ
ಜೊತೆ ಮುತ್ತಾಗಿ ತೇಲಿಬಂದು
ನಿನ್ನಂಗಾಲಿಗೆ ತಾಗಿ ಹೇಳುವೆನಿದೋ
ಶುಭರಾತ್ರಿ - ಗೆಳತಿ

ಅಂದ ಕಿರುನಗೆಬೀರೆ ಚೆಂದದಾ ನಿನ್ನಂ
ದವ ಸವಿದು ಪಿಸುಮಾತಿನಲಿ ನಿನಗೆ
ಸುಖ ನಿದ್ರೆಗುಮುನ್ನ ಮತ್ತೊಮ್ಮೆ ಇದೋ
ಶುಭರಾತ್ರಿ - ಗೆಳತಿ